एजेन्सी–असोज । अस्ट्रेलियामा जारी एनएसडब्लु प्रिमियर क्रिकेट प्रतियोगितामा सन्दीप लामिछानेले उत्कृष्ट प्रदर्शन गरेका छन् ।
प्रतियोगिता अन्तर्गत शनिबार भएको खेलमा सन्दीपकै उत्कृष्ट बलिङले अष्ट्रेलियाका पूर्वकप्तान माइकल क्लार्कको वेस्टर्न सबअर्बस क्लबले जित हात पारेको छ । टस जितेर ब्याटिङ गरेको मोस्म्यानलाई वेस्टर्न सबअर्बसले ६ विकेटले पराजित गर्न सफल भयो । सन्दिपले उत्कृष्ट बलिङ गर्दै ८ ओभरमा १७ रन दिएर १ विकेट लिन सफल भए । ८ ओभर बलिङ गर्ने क्रममा सन्दीपले कुनै अतिरिक्त रन दिएनन् ।
सन्दीपले पहिलो खेलमा नै अष्ट्रेलियाका खेलाडीको मन जित्न सफल भएका छन् । अष्ट्रेलियाका पूर्वकप्तान माइकल क्लार्कको निमन्त्रणामा सन्दीप केहि दिन अघि अष्ट्रेलिया गएका थिए । खेलमा मोस्म्यान क्लबले ४७ ओभरमा सबै विकेट गुमाउदै १ सय ४१ रन बनाएको थियो ।
१ सय ४२ रनको बिजयी लक्ष्य पछ्याएको वेस्टर्न सबअर्बसले ३८ ओभरमा ४ विकेटको क्षतिमा विजय लक्ष्य भेटाउन सफल भयो ।
